ପୁରୁଣା ଫର୍ମାଟକୁ ଫେରିଲା ବିଜେଡି: ବିପର୍ଯ୍ୟୟକାରୀଙ୍କ ହାତରେ ସଂଗଠନ, ଅଟକିଛି ରାଜ୍ୟ କାର୍ଯ୍ୟକାରିଣୀ ଓ କମିଟି

ସାଧାରଣ ନିର୍ବାଚନରେ ଶୋଚନୀୟ ପରାଜୟର ପ୍ରାୟ ୧୦ମାସ ପରେ ବିଜେଡି ନିଜର ପୁରୁଣା ଫର୍ମାଟକୁ ଫେରିଛି । ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କୁ ମୋହରା କରି ଦଳର ସାଂଗଠନିକ ପରିଚାଳନାକୁ ପୁଣିଥରେ ସେହି ପୁରୁଣା ଗୋଷ୍ଠୀ ନିଜ ନିୟନ୍ତ୍ରଣକୁ ନେବାରେ ସକ୍ଷମ ହୋଇଥିବା ଜଣାପଡ଼ିଛି । ଦଳର ବିପର୍ଯ୍ୟୟର କାରକ ସାଜିଥିବା ଏହି ଗୋଷ୍ଠୀ ପୁଣିଥରେ ସଂଗଠନକୁ ସମ୍ପୂର୍ଣ୍ଣ ଭାବେ ନିଜ ନିୟନ୍ତ୍ରଣକୁ ନେଉଥିବାରୁ ବିଜେଡିର ଭବିଷ୍ୟତକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି । ଯେଉଁଥିପାଇଁ ସାଂଗଠନିକ ପରିଚାଳନାକୁ ନେଇ ପୂର୍ବରୁ କ୍ଷୁବ୍ଧ ଥିବା ଦଳର ପୁରୁଖା ନେତାମାନଙ୍କ ପରେ ଏବେ ଦଳର ଆଗଧାଡ଼ିର ନେତାମାନେ ବି ନିଜର ଅସନ୍ତୋଷ ଜାହିର କରିବାରେ ଲାଗିଥିବା ଚର୍ଚ୍ଚା ହେଉଛି । ଦଳର ଏଭଳି ଆଭିମୁଖ୍ୟକୁ ନେଇ ଏବେ ଦଳୀୟ ମହଲରେ ଅସନ୍ତୋଷ ତୀବ୍ର ହେବାରେ ଲାଗିଥିବାବେଳେ ବିଜେଡିର ଅଘୋଷିତ ସର୍ବେସର୍ବା ପରଦା ପଛରେ ରହି ନିଜର ଖାସ୍ ଅନୁଗତ ଗୋଷ୍ଠୀ ମାଧ୍ୟମରେ ସଂଗଠନକୁ ନିୟନ୍ତ୍ରଣରେ ରଖିବାକୁ ଗୋଟିଚାଳନା କରୁଥିବା ନିର୍ଭରଯୋଗ୍ୟ ସୂତ୍ରରୁ ସୂଚନା ମିଳିଛି । ନବୀନ କ୍ରମାଗତ ନବମଥର ସଭାପତି ନିର୍ବାଚିତ ହେବାର ୧୦ଦିନ ବିତିଯାଇଥିଲେ ମଧ୍ୟ ବିଜେଡିର ରିଟର୍ଣ୍ଣିଂ ଅଫିସର ପ୍ରତାପ କେଶରୀ ଦେବ ଏପର୍ଯ୍ୟନ୍ତ ଦଳର ରାଜ୍ୟ ପରିଷଦ ଓ ରାଜ୍ୟ କାର୍ଯ୍ୟକାରିଣୀ ତାଲିକାକୁ  ସାର୍ବଜନୀନ ଓ ଚୂଡ଼ାନ୍ତ କରିବାରେ ସକ୍ଷମ ହୋଇପାରିନଥିବାବେଳେ ଏହି ଗୋଷ୍ଠୀ ନିଜର ହାକିମାତି ଦେଖାଇ ରାଜ୍ୟ କାର୍ଯ୍ୟକାରିଣୀ ସଦସ୍ୟ ଚୟନ ଓ ସାଂଗଠନିକ ପଦାଧିକାରୀ କମିଟି ଚୂଡ଼ାନ୍ତ କରୁଥିବା ଜଣାପଡ଼ିଛି ।